Ditulih oleh Novri Investigasi
Alek lah salasai. Pesta Pekan Olahraga Provinsi (Porprov) Sumbar ka XVI barakhir. Nan juara umum, paliang banyak madalinyo alah nampak juo. Indak ka baranjak dari Kota Padang, tasabuik juo Kota Bingkuang
Maklum se wak nyo. Pitih paling banyak. Baitu juo jo atlit nyo. Ditambah jadi tuan rumah 20 cabang olahraga (Cabor). Tantu, lah ka jaleh sajo juara umum. Bonusnyo paliang gadang, mambuek atlit samangaik bajuang
Kini Wak kasampiangan Porprov ko. Nan dipikian, baa kalanjuik an nyo. Bibit alah nampak, atlit alah ta seleksi untuak ka ikut Pekan Olahraga Wilayah (Porwil) jo Pekan Olahraga Nasional (PON). Lai ado juo pambinaan balanjuik an dek anggaran lah tandeh
Antahlah, yo ndak dapek wak manjawek. Dek Wak ndak sato, indak ikuik bakacimpuang jo dunia olahraga ko.. Wak faham se nyo, dek Wak indak atlit, indak Lo bakuaso. Tapaso Wak, bae basuaro. Walau indak ka didangaannyo. Yo sabana ka mari bedo
Nan jaleh dek Wak, alek usai, atlit alah diseleksi, tantu dipasiap an lai ikut lomba nan labiah tinggi, mode Porwil jo PON. Baa caro kalanjuik an, atlit nan alah ta seleksi ko. Latihan surang surang atau di TC an kicek urang. Nan TC ko, Wak kurang faham, dek Bahaso Inggirih
Namonyo atlit, urang nan kancang olahraga, kareh balatiah, punyo samangaik tinggi, kok disuruh latihan surang, baa gizinyo. Ndak talok ditulak jo talua saparo masak, tambah susu bendera. Tu gizi sasuai kebutuhan atlit. Kok Indak loyonyo, kurang tanago, sakik kuniang nan tibo
Yo tatitip juo harapan dek Wak. Jan sampai putuih pambinaan, jan patah tangah jalan. Bia tanang balatiah, indak bacabang pikiran, kesejahteraan dipikian juo. Sahinggo, samangaik juo mambela Sumbar di Porwil jo PON samakin manyalo. Baa dek sanak tu
About the Author
