Dicaliak kini ko, alah maruyak barita karajo proyek di media online nan ado di Sumbar. Satiok hari kalua, sado media online ikuik sato. Ciek kalua, maruntun nan mairingan. Isinyo samo, jan kan ciek alinia, ciek kalimaik, ciek kato pun ndak ado barubah huruf. Yo 100 persen copy pastenyo.
Baitu bana manggaung barita proyek sairiang makin maruyaknyo media online. Batanyo juo urang sagalanggang, kok bisa mode itu. Indak paralu batanyo jo rumpuik bagoyang, indak ka dapek jaweknyo. Ibaraiknyo, ado gulo, ado samuik. Dima ado gulo disinan mangarumun samuik.
Apo sabab jo karano? Dalam pikirannyo, satiok karajo proyek jauah dari jujur, banyak dutonyo. Mako sato sakaki mambaritakan. Yo bak kato sabalunnyo, ibaraik lauak puyu, suko baranang di aia karuah. Mako baserak media online manyorot karajo proyek.
Indak paralu, mangarati spesifikasi teknis. Apo lai filosofis investigasi infrastruktur’ tahu dulu baru batanyo, mangarati dulu baru manulih’. Hanyo turun ka lapangan ba modal kartu pers, hp Mamoto sarato saketek nyali untuak ‘manggaham’ rekanan.
Kato pambuka, katiko basobok jo kontraktor di lapangan, bantuak profesional bana. “Dima diambik materialnyo, ka sia dibali Bahan Bakar Minyak (BBM), Baa kok indak pakai Alat Pelindung Diri (APD), urang bakarajo. Nan saketek Iko sajo nan ditanyo, kontraktor alah cameh
Dek takuik juo, mako kontraktor, ba lunak kato. Baujuang ado nego, makan dapek, rokok tabao, minyak Oto jo Honda taisi pulo. Tatitip juo balanjo untuak sa hari ko. Yo sanang bana, hiduik jadi wartawan nan suko batandang ka proyek. Baranang di aia karuah’, kato kasanyo.
Tantu batanyo juo, jikok nan diharok, indak sasuai salero. Iko nan tabedo. langsung tarabo, kalua nan buruaknyo. Baserak barita di media. Tabaco jo nan lain, ikuik juo sakaki, mambaritakan. Proyek itu, manggunoan material jo BBM ilegal.
Urang nan bakarajo, indak pakai APD. Bia barita samakin padiah, buka gugel, cari aturan nan diabaikan kontraktor. Baruntuang bana jadi wartawan kini, indak paralu, banyak mambaco, mangatahui spesifikasi teknis, tingga buka gugel, salasai
Sabananyo, kok lai mangarati mambaco gambar karajo, Indak sulik maungkik, karajo proyek. Didakek proyek itu, ado namonyo Direksi Keet, bahaso awaknyo Rumah Gadang proyek. Di dalam ruangan, biaso tapampang gambar karajo
Calik gana dulu gambar tu, sabalun mancalik karajo di lapangan. Disinan tabukak apo nan dimainan kontraktor. Iko sasuai jo defenisi kasus. Apo nan tajadi, baa sabananyo nan tajadi. Di gambar karajo mode Iko, dilapangan lain pulo. Mako basobok boroknya. Alah mah yo. Carito Wak habih disiko
Panulih
Novri Investigasi
About the Author
