Karya : Novri Investigasi
Murai bakicau di ujuang surau
Suaro azan manyantuah kalbu
Dingin malam Indak ka risau
Jo mato barek pasa dituju
Dibantang lapak tampek manggaleh
Bahujan paneh manunggu pambali
Baitu bana badan bakureh
Untuak mancari sasuok nasi
Arok untuang malang nan tibo
Patugas bana mambuek seso
Lapak dibongka dagang dibao
Disiko hati mako tarabo
Pai manggaleh panyambuang hiduik
Dek bansek mako co iko
Indak mukasuik mancari ribuik
Sansaro juo nan ditarimo
Kok dikana, padiah bana taraso. Diingek ingek, dihati sabana tasandek. Dek bansek juo malakek ka diri, urang babuek sakahandak hati. Jo aia mato mancari rasaki, dari pagi hinggo malam hari. Nan didapek hanyo sasuok nasi
Pagi mulai marangkak, kicau murai mamacah sunyi. Suaro azan bakumandang syahdu. Jo mato barek kaki melangkah bakawan dingin. Jo baban barek dipundak bakawan ambun. Marendo untuang, mancari rasaki
Nan kayo Lalok bagaluang salimuik taba. Urang bapitih, bagaluik jo mimpi. Nan bansek mangakeh mancari rasaki. Co itu bana hiduik dijalani. Malang juo banimpo diri. Hari ka hari bakawan sansaro. Antah pabilo mancubo sanang
Indak paralu disasali, ka Nan Kuaso sajo basarah diri. Alah suratan ka badan diri, garih hiduik nan dijalani. Kok Kayo, kayo lah surang, denai indak kaminta. Usah tuan buruak sangko, denai bia manggaleh sajo. Dek pasa tampek usaho, mako denai manggaleh disiko, manga tuan gaduah juo
Lapak Sadang tabantang, galeh baru di kaka, tuan datang razia. Iyo malang bana. Bukan Indak tahu jo aturan, dek bansek juo bagantuang di badan, mako denai malawan. Bakato urang, daripado cakak jo kalang kalang, bia cakak jo urang. Itu nan denai hadang
Antahlah, kok dirantang makin panjang, dielo makin kusuik. Bialah jo lagu denai badendang, walau suaro sumbang. Ratok Padagang Kaki Limo nan dibaoan. Iko bukan hiburan, tapi jo lagu manyampaikan, padiahnyo hiduik Jo parasaian. Suko tak suko, danga selah. Dek denai hanyo pahilang rusuh jo gundah. Antahlah
Panulih
Novri Investigasi
About the Author
