Ka surau pai mangaji
Pai mangaji malam hari
Kalau diliek visi jo misi
Sabana manusuak di hati

Kue lapis bacampuan kantan
Lamak dimakan basiram gulo
Sagalo gratis nan dimainkan
Kesejahteraan warga diangkek juo

Buah kuini buah mangga
Di jua urang di Pasa Siteba
Bajanji mensejahteran warga
Saudara dakek antah baa

Rang Simpang haru ndak ka kampuang jua
Pai basamo naik oto
Co itu bana marayu warga
Asa ka lai mandapek suaro

Baragam ragam, tingkah calon kapalo daerah nan ka ikuik Pilkada 2024 nan ko. Visi dan misinyo sabano babahayo. Sagala gratis nan disabuik, mensejahterakan warga nan dianjuangkan. Ntah iyo, ntah indak. Kok iyo ingin mansejahterakan warga, calik an dulu, lah bisa mensejahterakan sanak saudara

Ingat, kapamimpinan itu, dimulai jo nan paling dakek. Sabalun barambisi mamimpin dan mansejahterakan dalam skala labiah gadang. Intinyo, seorang pamimpin idealnyo alah manunjukkan kamampuan dalam mansejahterakan lingkungan nan tadakek. Bisa, barupo keluarga, kelompok sosial yang labiah ketek

Pamimpin nan kredibel, nan dapek manunjukkan bukti konkret jo upaya upaya yang alah dilakukan untuak maningkatkan kesejahteraan urang urang tadakek. Jan bajanji, mansejahterakan warga, jikok alun tabukti mansejahterakan saudara dakek. Sebuah kritikan tajam calon pamimpin yang acok manyabuik janji janji manis mensejahterakan warga. Makonyo, paralu konsisten antaro ucapan jo pabuatan

Kato Ndak Sasuai Jo Kenyataan

Kalau inok manuangan. Wak, calik dakek jo caliak jauh, Pilkada serentak 2024 ko, khususnya Pilwako Padang. Yo, sabana manih kato rayuan, sabana lamak galemoknyo. Babagai gaya dimainkam. Bacaro carito nan disampaikan. Sado gratis nan disabuik, sado santunan nan dibuek. Mensejahterakan warga dan babanggaan. Lai, ka sabananyo tu. Kalau ko yo ragu wak

Baa, ka indak. Dicaliak janji manih tu, alun sasuai jo kenyataan. Alun nampak buktinyo. Itu bisa wak caliak dilingkungan tadakeknyo. Banyak sanak saudaronyo nan hiduik susah. Ado juo nan indak bisa maurus BPJS. Kadang, untuk makan sahari hari, dapek lai dapek indak. Samantaro, inyo hiduik bagalimang harato, tapi indak paduli jo sanak sudaro. Ehhh ya yai, kesejahteraan warga nan dipikiannyo

Apo lai, katiko kampanye kini. Sabana bagalibuik caritonyo. Sa akan akan iyo sabananyo. Padahal, ndak ka basobok jo kanyatoan nan tajadi. Tapi, demi sabuah ambisi, manjalang dapek nan dinanti. Bia kini obral janji. Nan paralu suaro dapek, bia turun sampai manjilek. Tapi, satalah kainginan dapek, bukan warga jo sanak sudaro nan disejahterakan, mambalik an modal nan tapikian.

Makonyo, sabalun mamilih, calik juo lingkungan dan sanak sudaronyo. Lai taparation salamo ko, lai babagi salamo ko. Kalau indak ado, bararti gadang ota mah. Jan picayo, kato kato mansejahterakan warga tu. Malah, kalau tapilih warga nan mansejahterakan inyo mah. Nyo umpan wak sahari, nyo kanyang salamo limo tahun. Ehh sansai

Penulis
Novri Investigasi