Acok juo mandanga, lah manjadi carito dek urang banyak. Antah Iyo antah indak, nan kaba ko lah baserak, lah maruyak. Apo bana kaba tu? Dek ribuik juo urang di galanggang. Lai indak asa bakarang, bamukasuik mamojok an urang
Kiro kiro iko carito nan ditarimo, dek sampai juo ka talingo. Bakisau juo angin, bararak juo awan, dek saluang manyampaikan, rabab nan ba ka baan, ditulih juo malapehan baban pikiran. Samantang nan tajadi, iko carito ASN mampakayo diri malalui dana Operasional Jo Pemeliharaan
Carito ko bamulo katiko kalua dana Operasional Jo Pemeliharaan. Ado di APBN ado juo di APBD. Pokoknyo satiok tahun ado anggaran ko. Tu, apo bana dana OP? Apo bedanyo jo dana pembangunan. OP dana mamelok an nan lamo alah rusak. Bia nan ado tu bisa batahan lamo
Samantaro dana pembangunan ka untuak buek baru. OP ibaraiknyo pitih untuak barubek, jikok sakik. Kini dipasampik carito ko, lai buliah dana OP dikarajoan dek ASN. Jaweknyo tu lai buliah, namonyo swakelola
Sifaiknya pemeliharaan ringan, tapi indak asa sajo. Satidaknyo ASN punyo jabatan fungsional, sasuai keahlian jo bidangnya. Ado juo nan diagiahan ka rekanan, malalui pengadaan barang dan jasa, jiko karajo gadang resikonyo.
Salang Perusahaan Urang
Nan tajadi kini, indak sasuai jo aturan karajo OP ko. Baa kok indak, alah sato urang dalam bamain untuak karajo OP. Nyo pakai perusahaan urang, tapi inyo mangarajoan. Nan punyo perusahaan dapek juo kapacaknyo, babaluik fee.
Iko lah sabana maruyak, ladang mancari tambahan balanjo, cukuik mambuek kayo. Indak paralu disabuik tampek, dinas sarato instansinyo, tapi alah tajadi cando iko. Tiok tahun batuka raso, ASN dibueknyo. Yo, sabana sero, gaji ado tambahan dapek juo
Indak paduli, bahayo nan katibo. Lupo resiko nan ka tajadi. Dek pitih juo, silau mato. Kini, alah diingek an juo dek Pasal 5 Peraturan LKPP No 3 Tahun 2026, melarang keras pengalihan seluruh pengerjaan utama kepada pihak lain.
Jiko Mada juo, perusahaan kanai blacklist nasional, jajarannyo sarato direksi dijarek pasal penyertaan tindak pidana (pasal 55 KHUP). Baitu juo ASN nan nekat jo kareh kapalo ado pulo saksinyo.
Karano salang perusahaan urang sacaro sapihak, karajo ilegal malangga hukum administrasi, kode etik ASN sarato tabuka paluang gadang masuk ka ranah pidana
Banyak juo ka dicaritoan lai, apo nan ka ditarimo dek ASN jikok nekat juo manyalang parusahaan urang. Samantaro bia sampai disiko sajo dulu, isuak ka disambungan juo carito. Bia tuntas, tas, tas. Alah mah yo.
Ditulih dek
Novri Investigasi
About the Author
