Ndeh, takah Iko bana mancari pitih. Nan diharok, hanyo mancari sasuok nasi, malang juo nan manimpo. Antahlah, katiko urang kayo, basalimuik angek di ateh tampek tidua. Dibuai dinginnyo AC, padagang marangkak ka pasa, pai manggaleh bagaluik dingin pagi
Ba arok juo kaluarga di rumah, pulang lai mambao pitih. Walau hanyo palapeh makan patang jo pagi. Balabiah juo ka untuak ongkoih sakolah. Paneh nan di hadang, hujan nan di tantang, suaro kareh ba ariak arak, manjojohan galeh, maimbau urang.
Galeh baru dibantang, lapiak mulai di kambang, jo bismillah mimpi tabantang, kok lai mambao pitih pulang. Ondeh, malang alun pacah talua, Sat Pol datang ma hadang. Mako disiko taburangsang. Sabana malang, nasib rang padagang
Bak kicek urang, daripado cakak Jo kalalang, bia lah bacakak jo urang. Galeh di gaduah, indak paduli sia nan datang. Ombak gadang, pantang basuruik ka balakang, apo lai Sat Pol PP, lai juo samo urang. Ba urak langkah, siap parang
Sakileh carito ko, acok tajadi di Pasarraya Padang. Bak sinetron baulang ulang. Patang tapeknyo, Rabu (21/10). Bamulo katiko 169 Padagang Kali Limo (PKL) ditertibkan, di Jalan Sandang Pangan. Paneh manggalagak di hati padagang, katiko patugeh gabungan, barupayo mambuka barier nan dipasang padagang jo mambongka lapak galeh nan lah tabantang
Indak manarimo dibuek cando Iko, PKL marabo. Indak galeh sajo malayang, batu ikuik Tabang, 7 personel Sat Pol PP luko luko. Indak sabandiang parang Iran Jo Amerika, tapi bakuhampeh padagang jo Sat Pol, labih garang pado di hoyak gampo. Yo sabana bedo
Mancakam, runyam, bak api dalam salam, sabana badaram. Batanyo juo galanggang rami. Baa bana cando Iko. Tiok sabanta bakuhampeh. Satiok panartiban baujuang parang bakasansam. Naik pitam, payah diradam. Ntah lah, ndak dapek Wak manjawek. Wak sarahan sajo panguaso nagari ko. Bialah carito Wak sampai disiko sajo
Panulih
Novri Investigasi
About the Author
