Wakie Rakyaik jo Kapalo Daerah Tido, Irwan Basir Indak Baranti Babagi

Oleh : Novri Investigasi

Gunuang Marapi tatutuik awan hitam
Galok manimpo Desa Pariangan
Patando hujan nan katibo
Arok ka tarang di pagi hari

Tasabuik Irwan Basir Datuk Rajo Alam
Indak pulo anggota dewan
Kapalo daerah pun tido
Tiado hari taruih babagi

Tinggi manjulang gunuang Singgalang
Sabarih jo gunuang marapi
Bakuliliang awan mambubuang
Tampak nan Danau dari Singkarak

Batanyo juo urang sagalanggang
Apo bana nan Irwan Basir cari
Kok Caleg samo dianjuang
Kajadi Kapalo daerah samo diarak

Indak ado kato nan kadi kabaan lai. Lah habih sagalo kalimaik dikaluaan. Indak sabandiang rasonyo, apo nan dibuek Irwan Basir Datuk Rajo Alam. Cando malaikaik turun ka bumi. Indak baranti babagi. Jiko dihitung ndak ta hituang jo jari. Kok disabuik, lah kusuik suaro rabab nan mangabaan. Lah lendo tukang saluang manyampaian.

Kok diinok manuangan, sia bana Irwan Basir Datuk Rajo Alam ko. Wakia rakyaik indak, kapalo daerah pun tido. Kok karajonyo malabihi urang nan manarimo sagala kalabihan dari suaro rakyaik. Samantaro, nan dikaluaan untuk rakyaik juo dari pitih rakyaik. Barupo Porkir, aspirasi sarato bantuan lain. Nan Irwan Basir baragiah dari pitih pribadi, indak pakai dana APBD. Tapi, babagi tiok hari.

Nan mambedaan wakie rakyaik jo kapalo daerah, Irwan Basir, tibo ndak diundang, ado malang nan manimpo warga nyo manjalang. Kaba baik bahimbauan, kaba buruk bahambauan. Ciek lai bedanyo, wakie rakyaik jo kapalo daerah datang kalapangan musiman. Tarutamo musim baralek rakyat, pesta demokrasi Bahasa Indonesia nyo. Itu juo ado mukasuiknyo, pancitraan kicek urang politik.

Irwan Basir, indak musim musiman, indak pulo ado mukasuik. Jo rila hati maagiah bantuan ka warga. Indak kini sajo, katiko si covid19 marusak sagalonyo. Hancua ekonomi, mati mato pancaharian sarato mati raso, Irwan Basir lah baserak langkah ka galanggang manyalurkan paragihan. Ba ton ton bareh nan ado ditampek panggiliangan padinyo, dikaluan untuk mambantu warga nan kanai dirumahan, akibaik covid19 manggilo.

Raso ibo ka warga kanai lockdown, Irwan Basir basarato maagiah warga jo pitih pribadi. Pitih gaji jo usahonyo, indak pitih APBN nan dibagi bagian ka warga. Tiok hari mandatangi warga nan dilendo panyakik asa Chino ko. Santiangnyo, Irwan Basir juo manolong warga malalui DPD LPM Kota Padang nan di nakhodoinyo. Baserak paragihan ka warga, walau pakai namo LPM, tatap juo pitih pribadinyo. Sakali lai, indak pitih APBD.

Samantaro, wakie rakyaik jo kapalo daerah baranti maagiah warga, katiko covid19 malandai, Irwan Basir, samakin manjadi sajo. Manariknyo, indak sajo warga ditimpo bancano, organisasi juo dibantu. Tamasuk juo, untuk olahraga jo kagiatan agamo. Dek acok maagiah warga jo kagiatan masyarakaik, Irwan Basir malabihi wakie rakyaik jo kapalo daerah. Indak picayo, apo bana kagiatan warga, Irwan Basir diundang. Sagala acara Irwan Basir nan mambuka.

Baitu juo, katiko warga nan maningga, Irwan Basir dinanti, malapehan maik. Satiok ado bancano mangamuaknyo si jago merah, Irwan Basir tibo manjalang, mambantu maringan warga ditimpo bancano. Antahlah, ndak ado nan kadi sampaian lai, apo nan dipabuek Irwan Basir. Sahinggo galanggang rami batanyo, apo bana dicari Irwan Basir. Talompek juo dimuluik warga, kok niek jadi wakie rakyaik dianjuang basamo.

Kok, mukasuik jadi walikota diarak basamo. Karano warga ado juo niek mambaleh budi nan dipabuek Irwan Basir salamo ko. Jawek Irwan Basir indak ado juo. Batanyo tanyo juo dihati nan ko, jo rila hati, jo niek suci dipabuek Irwan Basir salamo ko, tantu warga paralu tahu juo. Lah panjang bacarito, lah bakunang mato, lah panek jari ko. Wak tunggu sajo, kato baiyo dari Irwan Basir. Basambuang

About the Author

Investigasionline

Administrator

Visit Website View All Posts